الإرهاق النفسي
ليش بحس إني تعبت من كل شي رغم إن حياتي طبيعية؟🥺❤️🩹
إذا صحيت يوم من الأيام وحسيت إنك ما عندك نفس تحكي مع حدا ولا ترد على الرسائل ولا تعمل أي شي مو شرط يكون في مشكلة كبيرة بحياتك. ومو شرط تكون مكتئب. بس ممكن تكون تعبت. التعب اللي عم احكي عنه مو تعب الجسد فقط.
تعب الروح. تعب الشخص اللي صارله فترة طويلة حامل أكتر من طاقته.
مرة قالتلي عميلة:
دكتورة آلاء، حياتي منيحة بس حاسة حالي مخنوقة. ولما بلشنا نحكي
اكتشفنا إنها مو متعبة من حياتها. هي متعبة من تجاهل نفسها. من سنين وهي عم تقول:
“بعد هالمهمة برتاح.”
“بعد هالظرف برتاح.”
“بعد هالشهر برتاح.”
بس الراحة ما كانت عم تجي. لأن المشكلة مو بالوقت.
المشكلة إنها كانت آخر شخص على قائمة اهتماماتها. كانت تسمع الكل إلا نفسها. تلبي احتياجات الكل إلا احتياجاتها. وتستغرب ليش طاقتها عم تخلص. كتير ناس مو ناقصها وقت. ناقصها اتصال بنفسها. ناقصها تسأل:
“أنا كيف حاسس اليوم؟”
بدل:
“شو لازم أعمل اليوم؟”
يلا ياعظيم/ة خطوتين عمليتين✅
الخطوة الأولى:
خد ورقة واكتب: شو أكتر شي مستنزفني بهالفترة؟ مو شو مزعجك. شو مستنزفك. في فرق كبير.
الخطوة الثانية:
اسأل حالك:
إذا كان التعب رسالة… شو عم يحاول يقلي؟
يمكن عم يقلك ارتاح. يمكن حط حدود. يمكن اطلب مساعدة. يمكن وقف تركض.
👑💚 تذكر
جسمك مو ضدك. ومشاعرك مو عم تعاقبك.
أحياناً التعب مو علامة ضعف. أحياناً هو آخر طريقة بيحاول فيها جسمك ينتبهك إنك نسيت حالك لفترة طويلة.
ويمكن أهم سؤال اليوم مو: كيف أتحمل أكتر؟
يمكن السؤال هو: كيف أعيش بطريقة ما تستهلكني كل يوم؟.
.A
