التعلق العاطفي
ليش ما عم بقدر انسى شخص أذاني؟🥺❤️🩹
إذا كنت عم تقرأ هالمقال، غالباً مو لأنك لسا بتحبه غالباً لأنك تعبت... تعبت من التفكير فيه. تعبت من مراقبة أخبارو. تعبت من إنو يجي على بالك فجأة وإنت عم تشتغل أو عم تشرب قهوتك أو حتى قبل النوم.
وفي سؤال بيتكرر كل يوم:
“إذا كان أذاني لهالدرجة ليش مو قادر/ة انساه؟
مرة سألت عميلة نفس السؤال.
قالتلي:
“دكتورة آلاء، أنا مو مشتاقتلو أنا مقهورة.”
وهون كانت بداية الفهم.
لأن أغلب الناس بتفكر إن التعلق بالشخص يعني حب. بس أحياناً ما منكون متعلقين بالشخص نفسه منكون متعلقين بالإجابة اللي ما أخدناها. متعلقين بالاعتذار اللي ما صار. بالتفسير اللي ما وصل. بالكرامة اللي انجرحت. وبالنسخة من حياتنا اللي كنا متخيلينها معه. لهيك مو كل اشتياق هو حب. ومو كل حنين هو رغبة بالرجوع. أحياناً هو عقل عم يحاول يفهم كيف صار كل شي هيك.
يلا ياعظيم/ة خطوتين عمليتين✅
الخطوة الأولى:
اكتب هالجملة وكملها:
“الشي اللي لسا موجعني مو هو… الشي اللي موجعني هو ________” خليك صريح مع نفسك.
الخطوة الثانية:
اسأل حالك: لو رجع اليوم… شو الشي اللي متوقع يعطيني ياه؟ حب؟ أمان؟ تقدير؟ إحساس بالقيمة؟ غالباً الحاجة الحقيقية موجودة هون.
💚👑 تذكر
التعافي مو إنك تنساه غصب. التعافي إنك تبطل تحتاج وجوده حتى تحس إنك بخير. وأحياناً أكبر خطوة للأمام هي إنك ترجع لنفسك بدل ما تضل راكض ورا تفسير منه.
.A
