القلق

كيف بعرف إن اللي عم حسّه قلق مو حقيقة؟🥺❤️‍🩹

إذا كنت من الناس اللي فجأة بيزيد دق قلبها أو بتحس بضيق نفس أو بيجيها شعور غريب إنها مو مرتاحة وما بتعرف ليش فغالباً سألت حالك هالسؤال:

طيب إذا اللي حاسه مو خطر… ليش حاسه بهالقوة؟

مرة إجتني عميلة وقالتلي:

دكتورة آلاء، أنا بعرف إنه ما في شي مخيف حوالَي بس جسمي مو مقتنع.

وهون كانت المشكلة. لأن القلق مو كذاب بس مو دائماً دقيق. القلق متل جهاز إنذار حساس زيادة عن اللزوم. متل إنذار سيارة يشتغل لأن قط صغير مرّ جنبها. الصوت حقيقي. الإنذار حقيقي. بس الخطر مو حقيقي. كتير ناس بيخافوا من الشعور نفسه. مو من الشي اللي صار. بيخافوا من الخفقان. من الرجفة. من التفكير. من الإحساس إنهم مو مسيطرين. ومع الوقت بصيروا يراقبوا جسمهم طول النهار. وكل ما راقبوه أكتر خافوا أكتر.

وكل ما خافوا أكتر ظهرت أعراض أكتر. وبتصير دائرة ما إلها آخر.

يلا يا عظيم/ة خطوتين عمليتين✅

الخطوة الأولى:

لما يجيك شعور مزعج اسأل حالك:

“شو الدليل الحقيقي إنه في خطر هلأ؟” مو شو اللي خايف يصير… شو اللي عم يصير فعلاً؟

الخطوة الثانية:

بدل ما تقول: “أكيد في شي غلط.” جرب تقول: “ممكن يكون هاد قلق وبس.” لاحظ الفرق. العقل بيتعامل مع الاحتمالات غير ما بيتعامل مع الأحكام القطعية.

👑💚 تذكر

مو كل فكرة بتخوفك حقيقة. ومو كل إحساس قوي يعني في خطر. أحياناً اللي محتاجه مو إنك تهرب من القلق… بل إنك تتعلم تسمع رسالته بدون ما تسلمه قيادة حياتك.

إذا كان القلق عم يحدد قراراتك، ويمنعك تعيش حياتك بشكل طبيعي، يمكن يكون الوقت مناسب تفهم جذوره وتتعلم كيف تستعيد إحساس الأمان من جوّا بدل ما تضل تدور عليه برا.

.A