الثقة بالنفس
المشكلة بثقتي بنفسي ولا بالطريقة اللي بشوف فيها حالي؟
في ناس جميلة وناجحة ومحبوبة ومع هيك مقتنعة إنها مو كفاية. وفي ناس عندها أخطاء ونواقص واضحة ومع هيك مرتاحة مع نفسها.
ليش؟
لأن الثقة بالنفس مو صورة بالمراية. الثقة بالنفس قصة بنرويها لحالنا كل يوم.
أتذكر عميلة كانت كل ما حدا مدحها تضحك وتغير الموضوع.
سألتها مرة:
ليش ما بتصدقي المدح؟
قالتلي:
لأنهم ما بيعرفوا حقيقتي.
هون فهمت المشكلة. هي مو شايفة نفسها بعينها شايفة نفسها بعين كل شخص انتقدها بحياتها. بعين أم قالتلها إنها مو حلوة. أو أب ما كان يمدح. أو شريك ما كان يشوف قيمتها. وبدون ما تنتبه صار صوتهم جواها أعلى من صوتها هي.
يلا يا عظيم/ة خطوتين عمليتين
الخطوة الأولى:
اكتب 10 صفات فيك مالها علاقة بالشكل. ولا بالمال. ولا بالإنجاز. بس صفات إنسانية فيك.
الخطوة الثانية:
كل مرة تنتقد حالك
اسأل:
“مين عم يحكي هلأ؟ أنا؟ ولا صوت قديم من الماضي؟”
تذكر
مو كل فكرة عن نفسك هي الحقيقة. أحياناً هي مجرد رأي قديم علق براسك وصار يلبس ثوب الحقيقة. والثقة الحقيقية ما بتبدأ لما تصير كامل بتبدأ لما تبطل
تحارب نفسك كل يوم.
A.
